Pergi ke kandungan

Koubasanan Kopomogompian Tayam id Jipun

Mantad Wikipedia
Ukiyo-e pinirin popkito iso tungau poingrikau id limput id nonggo poingukab o jondila kukuhus, miampai poingintong do karamayan kohoroon do takano mantad parai di poisomok, miampai kokitanan do Nulu Fuji id sodu. Numbul 101 id romut Gatus Kokitanan Poingaran-ngaran mantad Edo mantad Hiroshige (1856)
Tungau di pinosogu sabaagi do Limo Nohopod Sitisin do Tōkaidō pinirin di Utagawa Kuniyoshi id kayu (1850)

Koubasanan Kopomogompian Tayam id Jipun nopo nga kisajara di tanaru mantad po abad di pogulu, loolobi po ilo tungau. Tayam gogompion monuku kumaa aigandōbutsu (愛玩動物 lit. "pomoinan-tayam di upuson) toi ko' ngaran toniba nopo nga aiganbutsu, poingkuro po terminologi diti nosimban aantakan abad ko 20 kumaa ngaran Inggilis petto (ペット).[1]

Sajara

[simbanai | simbanai toud]

Mantad po Timpu Heian id Jipun (794-1185]], gatangon takawas o tungau om nokito sabaagi dapu karun di apaagau, asaru piolonon id pialatan do tongopoinsawat-sawat o kalas sabaagi kakamot kigatang kaagal do butia. Sanganu do tungau nga pinotatap montok ii raja-raja om tinimungan akaya no, miampai rikud di noilaan piipiro aristokrat manahak koingkatan pangkat kumaa diolo. Ontok 889 Emperor Uda minonuat id diari dau Kanpyō Gyoki tutungkap do tanak tungau di naanu dau. Nokopomoros isio do wulu tungau diri di atarang om minongimuri kowoowoyoon tungau diri, miagal ko mimbulugu soira mundorong om woyo dau do minghombo. Orohian tomod iri Emperor do tangak tungau gisom piagalon dau tihad do tungau do tarob toitom, di pokito do tupus taralom disio kumaa tayam diri. Ponuatan diti manahak koilaan kokomoi poingkuro kapanamangan do tungau ontok timpu diri. [2][3]

Tungau sandad nokoingaran id tema doid ukiyo-e id kayu, nowonsoi do artis miagal ko, Utagawa Kuniyoshi, Utagawa Hiroshige, and Tsukioka Yoshitoshi.[4] Ginayo do tungau di okodo ko mantad tasu om amu ogumu kapanamangan di nuru maan, kosudong ilo kumaa woyo koposion do tulun Jipun om ginayo do linimput om isoiso walai. Tasu sandad di poingiyon id walai amu okito sabaagi tayam doid walai gisom amu alaid mantad diri, kotimpuun do bibit miagal ko Akita di pogulu nopo nga gunoon montok manamong om magasu. Tungau sandad lobi gumu ko tasu sandad id Jipun.[2]

Tombolog miagal ko varied tit (山雀 yamagara) nogompi montok sinding diolo, kawagu montok kuil Shinto om polihis ginawo aantakan do Timpu Edo.[5]

Sada nopo nga kiwaa tadat di alaid no sabaagi tayam gogompion miagal ko spesies sada sandad Japanese rice fish (南目高 medaka).[6] Sada amas (金魚 kingyo) pinointutun do Sina id abad ko 16 om poingaran-ngaran id pialatan do aristokrasi om kalas samurai om au no laid nga id pialatan do papaadangang tu wotik di mogowit kosonongon om okoto. [7] Kopomiaraan do sada amas panakasabab do ogumu kopogisuayan dilo doid Jipun. Liis Kopogisuayan Sada Amas kohompit no spisis miagal ko Chinshurin, Izumo Nankin, Jikin, Hana fusa, Oranda, Ranchū, Ryūkin, Shubunkin, Shukin, Tamasaba, Tosakin, Wakin, om suusuai po.[8][9] Sada amas nogi nga pinagambal id bontuk koirakan doid pirin id kayu do artis miagal ko I Utagawa Kuniyoshi id kalaja dau miagal ko Kingyo-zukushi Hyaku-monogatari (“Mogisuusuai Sada Amas: Hatus Tangon Kotumporosian ”) om Kingyo-zukushi Tama-ya Tama-ya (“Mogisuusuai Sada Amas: Puta montok padagangon for Sale”).[8]

Kowoowoyoon sandad doid Jipun manahak koingkawason ginumu do mogisuusuai songongi loolobi po ontok musim talasu soira olubung o roun om poingkawas kosoguban. Songongi id Koubasanan Jipun oponsol tomod doid kitonggungan doid pisuk do musim. Panakasabab iti do kopomogompian do godu lunsing (鈴虫 suzumushi) mantad tinimungan aristokrat om Japanese rhinoceros beetle (カブトムシ kabutomushi) om stag beetle (鍬形虫 kuwagatamushi) om spisis miirad sabab no do tinan diolo di okoro om asanan manamong.[10][11][12][13]

Id piipiro toun kodohuri diti, manaanamong tayam gogompion id Jipun suai ko tingau suminimban mantad utilitarian kumaa konsep di lobi poinggonop di mintong tayam sabaagi soboogian do paganakan. Montok kogumuuan Japanis, upuson o tayam gogompion miagal tanak, om somonu silihon sabaagi pongolon montok di momili do mada papagayo tanak.[14]

Spiritual Hirarki

[simbanai | simbanai toud]

Id pisuk do spiritual hierarchy, tayam gogompion nopo nga poinsiriba do tulun nga id sawat do toinsanan tayam om bontuk koposion suai.[15] Koyonon diti amu po atalang o rati, om mongiduan ogumu po pisuk manaanamong tayam kumaa mogisuusuai pomusarahan, kohompit no o laang manamong tayam gogompion, om laang totopot montok manarampas diolo kalapas apatai. Koyonon diti id paganakan okito maya mogisuusuai bontuk koposion tikid tadau tulun kontemporari, kopomolombusan spiritual kopomusarahan om tadat kapamalabangan tayam gogompion id Jipun.

Daamot diri tayam tolias miagal ko kitsune' (tolom), Bakas Jipun toi ko [Bake-danuki]] (tasu rakun) asaru mongigit koyonon takawas id suang Shintoism om susuyan do Jipun, Mantad toinsanan tayam sandad, anggapon o tungau sabaagi di bobos takawas o martabat om kosuang id tangon-tangon tongotulun di pikoiton kumaa kuasa-kuasa poimbida di osonong om araat miagal Kaibyō.[3]

Koingkawason Tayam Gogompion

[simbanai | simbanai toud]
Medaka fish kept in a ceramic bowl in Tokyo

Nokoinggumu o tayam gogompion id Jipun. Ahal diti popouhan diolo do haro tambalut, miampai aiso konuruan do haro tanak, nosili di tayam sabaagi alternatif montok tulun di aiso timpu papagayo tanak. Sundung au noilaan songkuro katapatan, nakaanu ponoriukan do iso trend id nonggo adopting pets maganu tayam gogompion sabaagi soboogian do paganakan mongolon do tanak nosiliu koubasanan. Ontok timpu diti, "kaagaon pokito do ginumu tayam gogompion lobi ogumu ko tanak id siriba do umul hopod om limo toun.”[15]

Koingkawason Tayam Gogompion Jipun milo intangan kawagu id toun 2003 id nonggo naaga' do ginumu tungau om tasu id Jipun lobi ogumu ko ginumu tangaanak.[16] Ginumu do tayam gogompion di naaga nopo nga 19.2 riong om tangaanak id siriba do 16 toun nopo nga soginumu 17.9 riong di toun 2003, om 23.2 riong kumaa 17 riong di toun 2009.

Tayam gogompion id koposion sangangadau

[simbanai | simbanai toud]
Hachikō was a famous Akita dog remembered for his remarkable loyalty to his owner. A statue dedicated to him was placed outside Shibuya Station

Sundung po do oinsok o posorili do Jipun om amu songkuro kosudong montok tayam gogompion, kopomosoi tulun Jipun do laang montok popohompit tayam diolo id koposion sangagadau. Laang kumoiso nopo nga momili bibit tasu di okodo sabaagi tambalut diolo.[17] Piipiro bibit tasu mantad paganakan Jipun nopo nga chihuahuas, miniature dachshunds, om toy poodles. Sabab nopo di koubasanan montok diolo momili bibit tasu di tokoro nga au ogumu o liwang, om ouhan momorisi.

Sundung do kaanangan o tasu tokros, nga haro kawagu bibit tasu di poingaran-ngaran id Jipun ii nopo nga Shiba Inu, di kaanu gumayo gisom 2 kaki om winagat korikot do 25 paun. Soboogian tulun Jipun nogi nga aanangan do Shiba Inu tu orohian tasu dii do paganakan om milo masi lobi do 15 toun, popomilo Shiba Inu sabaagi tambalut di anaru timpu doid koposion. Kiwaa nogi bibit sandad mantad Jipun,, ii no Akita, di otutunan maya susuyan do Hachikō.

Sabab do kadar kosusuan di mingsiriba om populasi di tumuo' id Jipun, ogumu walai di kiwaa o tayam gogompion nga aiso o tanak. [14] Mantad dii, sasatanga' paganakan di aiso tanak, manamong om mamagatang tayam gogompion dilo kaagal do tanak diolo sondii. Kapataranan id Jipun miagal ko kafe tungau, spa tasu om restoran di papabanar tayam gogompion do makan doid mika om makan miampai puru paganakan suai nokoburu no mantad po di toun 2004. Haro nogi tayam gogompion id Jipun di kaanu do kakayaan lamari rasuk sondii di noponu do bangkad haute couture di apagon mantad jenama miagal ko Chanel gisom Gucci di nowonsoi poimbida montok tayam gogompion. [18]

Tayam doid Jipun nopo nga sabaagi tambalu no. Tasu terapi kitonggungan tagayo montok monguhup di kikonuruan, momohiok susumakit id walai pongusapan om tambalut di tulun nokotuo no. Soboogian koisaan id Jipun, miagal ko Tokyo dii pongimpohon do Koisaan Terapi do Tasu Sompomogunan popoluda tadu di aiso sanganu sabaagi tasu terapi om pootodon id mogisuusuai walai kapanamangan om walai pongusapan id Jipun.[19] Poomitanan nopo tasu nga di nowonsoi do filem toun 2004 Mamanau miampai tasu: Chirori om Tamaru, id nonggo kono aangkal, Chirori, okon ko modop nga norubaan do mononondig Jipun om noluda montok monguhup tulun di otuo. Susuyan do Chirori manahak do inspirasi, om kiwaa o tugu montok dau nowonsoi.

Kopomusarahan om kapanamangan kalapas koidu pogun

[simbanai | simbanai toud]

Koubasanan donggulu-gulu do Jipun om Buddhism minamarahung do tadat kapatayan do tayam om kopomusarahan kalapas diri. Suai ko ii, koubasanan Barat om Kristianiti nogi nga manahak do bagas. Sundung do ingkaa, mogisuusuai o laang diri id Jipun om tumanud id do kotumbayaan, koubasanan om nogi pokionuon do tikid paganakan. Koubasanan nopo nga, tayam gogompion amu anggapon sabaagi do soboogian do paganakan. Sundung do ingkaa, kiwaa piipiro poomitanan tayam gogompion di numaan soroho om noonuan do kapanamangan kalapas do noiduan pogun aantakan id tanga do abad ko hopod om siam, kiwaa piipiro rikud di pokito goos dii pinokait kumaa tinimungan elit samurai.[20] Aantakan timpu diti, kogumuan tasu om tungau notorimo sabaagi puru do komuniti om amu mion id id nonggo-nonggo walai sosongulun. Aaantakan do kapatayan do tayam, koubasanan donggulu-gulu mokianu do kapanamangan tosonong montok tayam diolo mooi do atamangan o kampung diolo mantad rusod kidandam.[20] Konsep do rusod di kidandam nopo nga naanu mantad do kotumbayaan id nonggo "tayam tokoro miagal ko tasu om tungau osinggawa mamanau id nonggo nopo kalapas apatai om kisuang do kuasa do dandam (tatari) kumaa tulun”.[20] Mooi do amu oontok, om mooi do oolig mantad rusod do tayam, nuru di o laang poimbida, miagal ko kapamalabangan id koyonon osonong om popoowit do kakamot pointantu doid lobong do tayam diri. [20] Sokiro otonudan o proses, atamangan o kampung dii om amu akasau do rusod di napatai no.

Koubasanan do Buddhist, loolobi po kopomusarahan kumaa i Minamangun, minamarahung do ritual kapatayon om koposolimbahan montopk tayam id Jipun. Sundung do ingkaa "inggaa o skripsi di pointorodok montok tayam, om tayam gogompion pia" id suang do doktrin do Buddhist.[15] Mantad di, kasarahan montok tayam poingukab o kotumbayaan. Iso pioduhan aangkal id pialatan do puru spiritualisme kokomoi kitaran kosusuon kawagu id Buddhisme.[15] Soboogion tulun atantu do milo, sokiro poindalanon o kasarahan di otopot kalapas kapatayan, montok tayam gogompion diolo do kapaganak kawagu sabaagi do tulun. Tulun suai kopuriman do tayam gogompion milo kosusu kawagu nga sabaagi tayam kasari.[15] Kosoruan,

Kosoruan, Puru ugama do Buddhist papabanar do paganakan manahak kootusan ingkuro proses di maan diolo tonudo. Misuai koyonon panambayangan om misuai nogi o tadat di poindalanon om somonu popoiamung toi ko' tonudon ngawi nopo ritual di. [15] Id piipiro abad diti, pamalabangan do tayam nokoingkawas o nokoilaan. Id koyonon soliwan kakadayan, kogumuan tayam numaan lobongo' doid tana "id nulu soliwan do kokompungan, mooi do kopomonsoi kotoronongon id pialatan do tinan do tayam om nogi memori di koihadan".[20] Id kogumuan koyonon kakadayan, koyonon metropolitan, sanganu do tayam sondii i momili kapamalabangan montok tayam diolo di napatai. Kalapas dii, milo yolo momili do posuang popou diri id lobong, sosongulun toi ko' komuniti toi ko popokito iri doid suang do kolumbarium. [21] Kiwaa nogi kaantakan, sanganu do tayam mokilobong miampai tayam diolo di napatai no, om haro nogi mokianu kopoindalanan ritual di kaagal montok tulun. Sundung do ingkaa, kogumuan amalan di totopot papaharo rontob di pakakalntayam gogompion id disan, miagal po do id pialatan do status sabaagi puru paganakan om status sabaagi tayam tomod id tinimungan tulun ginumuan. [21] Misulak kumaa kotumbayaan do koubasanan donggulu-gulu, ogumu sanganu do tayam amu nodi otumbayaan do rusod do tayam nopo nga mangasau sokiro amu poindalanon o tadat kapamasarahan. Loolobi po, iri tadat om ritual kitonggungan sabaagi laang montok poposoriba katangaban om kotopurimanan do natagakan di nawayaan diolo maamaso poimpasi. Panakasabab iti do "tadat kapamalabangan do tayam id Jipun kosimban mantad sambayang montok rusod tayam kumaa laang montok sanganu popoulai kotupurimanan do katangaban diolo"[20] Tayam di napatai nopo baino nga sorohon sabaagi do puru do paganakan, om asaru haro kapamasarahan id altar do paganakan om kosiliu sabaagi soboogian do salasilah paganakan.

Id tinimungan tulun di misimban, roromu do tulun Topurak om nogi Kristianiti nogi nga osili kopirolot id laang kapamalabangan montok tayam diri. Poomitanan nopo rahung nga okito id gambal do Sunsuyon Buluntung, iso konsep di kaagal do bontuk surga do tulun Topurak.[15] Sunsuyon Buluntung nopo nga ointutunan sabaagi liwang utopia id nonggo rusod tayam di napatai kakal haro gisom apatai o sanganu diolo, om koduo-duo rusod diolo di mamanau mooi surga.[15] Konsep diti poposuni piromutan do tayam gogompion om sanganu diolo id kontemporari Jipun.

See also

[simbanai | simbanai toud]

References

[simbanai | simbanai toud]
  1. ↑ "愛玩動物", Wiktionary, the free dictionary (id boros Inggilis), 2023-06-24, linoyog ontok 2024-09-05
  2. ↑ 2.0 2.1 https://www.sg.emb-japan.go.jp/JCC/E-Magazine-Jan-2022-Neko.html
  3. ↑ 3.0 3.1 "Japan's Love-Hate Relationship With Cats". Smithsonian Magazine (id boros Inggilis). Linoyog ontok 2024-09-05.
  4. ↑ "Cats in Ukiyo-e Exhibition | Tokyo Cheapo" (id boros Inggeris AS). Linoyog ontok 2024-09-05.
  5. ↑ "History of bird-keeping and the teaching of tricks using Cyanistes varius (varied tit) in Japan". ResearchGate.
  6. ↑ "Medaka Fish: More Than Just Pets - Exploring Their Social Importance i". medakafarm (id boros Inggilis). 2023-10-07. Linoyog ontok 2024-09-05.
  7. ↑ "Old gold: An enduring love of a humble fish in Japanese art". www.bbc.com (id boros Inggeris British). Linoyog ontok 2024-09-05.
  8. ↑ 8.0 8.1 "Goldfish Have Been Loved for Many Years Due to Their Cute Appearance| Pop Culture | Trends in Japan | Web Japan". web-japan.org.
  9. ↑ "The Enduring Charm of Goldfish Hill | July 2020 | Highlighting Japan". www.gov-online.go.jp. Linoyog ontok 2024-09-05.
  10. ↑ Lombardi, Linda (2014-05-26). "How to Care for Your Beetle". Tofugu (id boros Inggilis). Linoyog ontok 2024-09-05.
  11. ↑ Fauks, Dr William. "Japanese embrace bugs as pets". The Oklahoman (id boros Inggeris AS). Linoyog ontok 2024-09-05.
  12. ↑ "里山のカブトムシ・クワガタムシ". kabutokuwagata-yh.la.coocan.jp. Linoyog ontok 2024-09-05.
  13. ↑ "Insects as Pets". Smithsonian Institution (id boros Inggilis). Linoyog ontok 2024-09-05.
  14. ↑ 14.0 14.1 Evans, Ruth; Buerk, Roland (2012-06-08). "Why Japan prefers pets to parenthood". The Guardian (id boros Inggeris British). ISSN 0261-3077. Linoyog ontok 2024-09-05.
  15. ↑ 15.0 15.1 15.2 15.3 15.4 15.5 15.6 15.7 Ambros, B. (2010). The Necrogeography of Pet Memorial Spaces: Pets as Liminal Family Members in Contemporary Japan. Material Religion, 6(3). 304-335. [DOI: 10.2752/175183410X12862096296801]
  16. ↑ Hoffman, Michael. (2011-07-17) It seems Japan has literally gone to the dogs. The Japan Times. Retrieved on 2014-06-23.
  17. ↑ Fackler, Martin (28 December 2006). "Japan, Home of the Cute and Inbred Dog". Linoyog ontok 4 June 2018 – via NYTimes.com.
  18. ↑ Pampered pets. The Japan Times. Retrieved on 2014-06-23.
  19. ↑ Rescued canines trained to give disaster-zone therapy. The Japan Times (2012-06-02). Retrieved on 2014-06-23.
  20. ↑ 20.0 20.1 20.2 20.3 20.4 20.5 Veldkamp, E. (2009). The Emergence of Pets as Family and the Socio-Historical Development of Pet Funerals in Japan. Anthrozoös, 22(4). 333.
  21. ↑ 21.0 21.1 Ambros, B. (2009). Vengeful Spirits or Loving Spiritual Companions? Changing Views of Animal Spirits in Contemporary Japan. Asian Ethnology, 69(1). 35-67.
Naanu mantad "https://dtp.wikipedia.org/w/index.php?title=Koubasanan_Kopomogompian_Tayam_id_Jipun&oldid=22710"