Pergi ke kandungan

Toni Wolff

Mantad Wikipedia
Toni Wolff
Wolff c. 1911 (age 23)
Nosusu
Toni Anna Wolff


(1888-09-18)18 Manom1888

Zürich, Switzerland
Napatai 21 Gomot 1953(1953-03-21) (kiumul 64)

Zürich, Switzerland
Momoomogun Swiss
Oilaan sabaagi Analytical psychology
Scientific career
Gana Psychology, psychotherapy, Analytical psychology
Institusi Psychologischer Club Zürich

Toni Anna Wolff (18 Manom 1888 – 21 Gomot 1953) nopo nga songulun momoomorindak mantad Jung Switzerland om sopiiyan di Carl Jung.[1] Ontok dii, pinosoliwan i Wolff momoguno ngaran dau sondii, nga minonguhup i yau di Jung montok monginimot, paparati om momungaran piipiro konsep i oilaan do kogumuan, kohompit no anima, animus, om persona om nogi teori kawo psikologi.[2][3] Sinuatan disido i bobos oilaan kopio do tulun nopo nga ponuatan kokomoi apat "kawo" toi ko aspek kowoowoyoon feminin : Amazon, The Mother, the Hetaira, om the Medial (toi ko mediumistic) Woman.[4] Kiwaa apat kawo di haro id carta kuadran miampai apat dimensi. Id suang carta diti, The Mother nopo nga mitoguang miampai Hetaira ontok garis poturidong, om tondu Medali misuai miampai Amazon id garis poinrantai.

Biografi

[simbanai | simbanai toud]

Nosusu i Toni ontok toun 1888 sabaagi tanak tigulu mantad tolu miadi-adi tondu id iso paganakan kiharo-haro id Zurich. Alapas nounsub yau do molohing montok momuka rahi kreatif, minopoingkawas i Toni rao rahi taralom kumaa falsafah, mitologi, om nogi astrologi.[5] Sundung do kirahi yau do mongoput pambalajaran kumaa taang di lobi akawas, amu di tapa dau pinasaga yau tu kipomusarahan do amu apatong o songulun tondu mantad kalas sosial diolo montok manganu pondidikan "himag".[6] Sundung go ingkaa, minonilombus i Toni do gaab dau miampai minomorigisto' doid kalas sabaagi mokiikinobos okon matrikulasi.

Ontok Momuhau 1909, maamaso kiumul i Toni do 21 toun, minidu pogun o tapa dau. Mantad kaantakan dii, noontok yau do kolungguyan di adalaan kopio. Minonimpuun yau do sesi pomorindakan miampai di Carl Jung ontok 20 Manom 1910, om noimayaan yau do intelek di Toni.[7] Irene Champernowne, di kotutun koduo-duo di Toni om Carl nopo nga kiboros do i Toni nopo nga haro "pomusarahan poimbida di atarom, obolotik kopio om kitotumboyoon tinan sondiri."[8] Minomolingos i Carl do kolungguyan di Toni miampai minongunsub dau montok momoguno pomusarahan maya aktif. Nosiliu yau iso mantad ko' "nuludan tanaru tondu di kirahi kumaa di Carl tu minapasaga diolo do momoguno rahi om kabaalan intelektual id gana psikologi analitik".[9] Minonguhup i Toni di Carl doid ponoriukan kokomoi psikologi om pointanud nogi yau miampai sawo di Carl Emma om tambalut karaja suai, kuminaa id iso persidangan psikoanalisis id Weimar, Jerman, ontok toun 1911. Id surat kumaa Freud ontok timpu dii, minopointalang i Carl di Toni sabaagi "iso kinorubaan wagu ku, Fräulein Antonia Wolff, songulun di kipomusarahan poimbida miampai topurimanan di aralom doid tugama om falsafah".[10] Minomupus i Carl do rawatan analisis di Toni kira-kira dohuri toun 1911, sundung do kitopurimanan yau do "kohompit maya personal" miampai tondu dii.[11]

Piantakan om koinganan di Toni kuminaraja miampai di Carl nopo nga nosiliu iso kaantakan toponsol doid kinoburuon dau sabaagi puruan pomorindakan om nogi puruan id tinimungan pogulu psikologi analitik id Zurich. Nosiliu yau do puruan pomorindakan di pantangon kopio, kumuduo alapas di Carl Jung id pisuk koimayaan id suang komuniti Jungian. Ogumu i kiandasan do kabaalan dau id terapi nopo nga lobi ko' di Carl Jung. Miagal di pinosotol di Tina Keller-Jenny: "Kipomusarahan oku do karaja dau nopo nga sabaagi iso 'inus'. Yau nopo nga puruan terapi di kitoilaan tomod. Nokoumbal oku minomisunud di Dr. Carl do amu kanto yau milo monguhup doho miagal poingkuro i Toni Wolff minonguhup doho."[12] Kaakun nogi i Irene Champernowne: "Asaru oku kopuriman do osomok oku nogi miampai kabaalan suang di Carl maamaso miampai di Toni ko' maamaso miampai oku di Carl maya fizikal. Yau nopo nga... tambalut suang doid karalano di Carl tumoguang do pomogunan bawah sedar."[13]

Suai ko iri, alapas nosiliu tondu kumoiso di nopili id komitikuasa eksekutif Psychologischer Club Zürich, noingkakat i Toni sabaagi presiden kalab dii om minongigit jawatan dii solinaid 21 toun. Pogulu kopolobusan Collected Works mantad Carl, kitonggungan yau sabaagi editor wanan montok karatas karaja di Carl, mongulud om popotounda dokumen-dokumen dii montok kopotikidan di lobi oliwas. Suai ko' esei dau di ointuntunan kokomoi apat bontuk nuludan feminin, minonuat nogi i Toni do piipiro makalah suai di kogumuan nopo nga montok monuduk ginumu tangaanak di mumu-gumu rumikot kumaa Zurich montok minsingilo doid gana' psikologi analitik. Soira noukab o Institut C.G. Jung id Zurich ontok toun 1948, minongia' yau do seminar pinsingilaan kumaa calon-calon puruan pomorindakan.

Id toun-toun tohuri do koposion dau, nakawaya i Toni Wolff do artritis di adalaan kopio, mantad doti do kaampayatan dau doid sukarelawan soujor id Switzerlan di pinosuai maamaso Pisasangadan Pogun Koduo.[14] Minonigup nogi yau solinaid poimpasi yau. Iti nogi iso sabab di minanahak bagas taraat kumaa kolidasan dau. Minonigowo yau do minidu pogun ontok 21 Gomot 1953 om amu noilaan o sabab kinapatayon, noontok doti' do serangan tundu'-undu' ontok umul 64 toun. Kinoyonon pamalabangan dau nopo nga id tana' pamalabangan Enzenbühl id Zurich.[15]

Aga-aga sontoun alapas nakaayi do pomorindakan Toni Wolff, nokoipi i Carl Jung piipiro nipi di popokito dau do konuruan montok miambalat kawagu di Toni; kolimpupuson nopo dii nga minonuat isio do surat kumaa di Toni ontok toun 1913.[16] Sinimuliu yau do tambalut intelek tohontol di Carl. Ontok timpu di miagal, momok-somok o piombolutan diolo. Pisamakan piombolutan di Carl om Wolf nopo nga haro kobolingkaangan id pisasawaan dau nga nokolodi' kasari iso bontuk pirotian[17] soira ointalang i Carl do amu mongidu sawo dau toi ko' i Toni, i kiboros yau sabaagi "sawo koduo" dau. Minogihum nogi i Carl do songulun "tondu Anima", om osokoyut kopio i Toni do tonggungan dii. Asaru i Toni do moi tombului id walai paganakan di Carl, sumoonu kumalaja miampai dau id opis walai dau mantad kosuabon gisom makan pintangadau paganakan (di amu yau moi amung), om tumilombus do kumalaja kawagu ontok sosodopon. Kasasaii nopo nga makan yau piptangadau miampai paganakan ontok tadau Tiwang. Ontok toun 1916, minaampayat i Toni, Carl om Emma do pongukaban Psychology Club of Zurich. Asaru isido koruhangon di Carl om sawo dau doid abaabayan tulun ginumuan om sosondiri.[18] Kosontob o nuludan diti kumaa di Carl i kiboros do "komponen poligami ku",[19] om kopiunung miampai kowoyo-woyoon koposion potilombus dau do papapsarabak koupusan dau kumaa piipiro tulun di lohowon dau do Jungfrauen.[20] Sundung do ingkaa, piipiro moomorindak kipomusarhan do nuludan pisasawaan diti nopo nga mamaraag do gatang tinan sondiri di Toni om Emma tu kapanahak koinggoritan tagayo kumaa diolo.[21] Ogumu timpu sondiri di naayi di Toni om Carl id Menara Bollingen, kinoyonon tombului sondiri i nowonsoi di Carl ontok timpuunon toun 1920-an.

Maamaso timpu introspeksi taralom di Carl tinumimpuun ontok dohuri toun 1913 – maamaso tinumimpuun isio do minonuat Red Book: Liber Novus — nosiliu i Toni do tokoh toponsol id koposion disio. Songulun tulun toilaan di osomok miampai diolo, Laurens van der Post kiboros do: "Id pogun soibau tana' di poinsuai-suai om kotompurolosi diti, ii nopo nga ketidaksedaran kolektif, yau (Toni) nopo nga ponuduk ralan di Carl... om yau no i mongigit do toinsanan talahan dii."[22] Ii Toni no ii minokinongou kokitanan, tipi, om fantasi di Carl Jung, kitonggungan sabaagi kinoyonon di Carl do popolombus suang ginawo om nogi sabaagi devil's advocate (moguugumbal pomusarahan).[23] Alapas piipiro toun, minomusorou kawagu yau: "Piipiro mantad dati nosonsog sumiliu kakamot kumaa pomusarahan om mogihum kesedaran di lobi aralom."[24] Id wawansara dau ontok toun 1957 miampai Aniela Jaffé, setiausaha om monuunuat biografi dau, kaakun i Carl do ontok timpu dii, amu yau milo popoboros kokomoi koinganan batin dau kumaa isai-isai nopo suai ko' i Toni. Pinopointalang i Jaffé do i Toni nopo nga "mongunguhup di Carl montok mamarati pogun imej psikis maya intelektual."[25]

Ontok iso timpu solinaid do proses dii, "norolihan" nogi i Toni do pogintangan di Carl om nakawaya do material psikis di miagal miampau dau — iso kaantakan di nabarasan di Carl sabaagi "araat tomod".[26] Id ponuatan teori dau, minopointalang i Carl do kaantakan dii sabaagi iso "pomorolihan psikis".[27] Tumanud momoomorindak Michael Fordham, adadi o ahal diti soira sosongulun dii monuduk tulun suai maya material psikis di koligogon tomod. Sabaagi ponuduk di Carl, natagak o kosulimbangan di Toni do daamot. Sundung do ingkaa, montok soboogian timpu tagayo ontok toun 1913 gisom 1917, kakal osiliu yau sabaagi toud wawasan om kosulimbangan kumaa di Carl.

Ontok timpuunon toun 1930-an, tinumpuun i Carl do monoriuk toilaan alkimia sabagi iso di kopiunung proses individuasi, nga amu i Toni sitanud do goos wagu diti. Ogumu i otumbayaan do minada i Toni tu kopuriman yau do topison i Carl tu monoriuk do subjek di apagon kopio do rotion om esoterik, nga Marie-Louise von Franz — i nosiliu tambalut tohontol di Carl id ponoriukan literatur alkimia — minonondos do mada i Toni tu haro komitmen dau kumaa tugama Kristian, om awagat dii topurimanan dau do kohompit doid ponoriukan dii. Id biografi di Carl di pinalabus ontok toun 2003, minanganu i Deirdre Bair piipiro boros-boros di von Franz do maya intelektual, "minogolon" yau di Toni Wolff id koposion di Carl Jung.[28] Booboroson diti naakun id iso filem dokumentari id hombo kiboros i von Franz id toguang do kamera:

Kasalaan tagayo di Toni nopo nga amu kisunduan kumaa alkimia. Nga orubat kopio do mada yau tumanud di Carl kokomoi diti, tu sundung amu, amu daa yau topison di Carl montok misokodung miampai doho. Momoguno toomod no daa i Carl doho montok pomodolinan, om kakal kasari yau do popolombus suang ginawo kumaa di Toni. Nga amu i Toni Wolff kirahi. Otumboyo kopio yau do ponudukan tugama Krisitan di konvensional, om miniada do tumanud dau.[29]

Sundung do minada i Toni do tumanud di Carl id ponoriukan dau kokomoi alkimia, nga atatap kasaii yau maya peribadi kumaa di Carl solinaid poimpasi yau om kakal komited maya poimpanu montok popoburu gana psikologi analitik.

Alapas noontok i Carl Jung do palangan tundu-undu ontok toun 1944, tumimpuun yau do minsodu maya emosi mantad di Toni. Amu nodii yau kokito di Toni sabaagi pongigit anima dau om okon nodi ko muse poimbida dau. Alapas minidu i Toni do pogun ontok toun 1953, amu i Carl minongoi id upacara pomuhandaman dau. Tambalut karaja dau, Barbara Hannah, kiboros do kolidasan di Carl om kolungguyan dau di oralom tomod nopo nga nosiliu sabab toponsol do amu yau minongoi. Sawo di Carl nogi i nokoongoi id upacara pomuhandaman di Toni sabaagi mongongobi diolo ngoduo.[30] Sabaagi tanda kahandaman kumaa di Toni, minongukir i Toni iso watu kahandaman montok mamagatang dau miampai suratan Sina maya poturidong i kirati: "Toni Wolff Lotus Nun Mysterious". [31] Piipiro timpu pogulu minidu pogun, minomisunud i Carl kumaa tambalut tosomok dau, Laurens van der Post, do minanahak i Toni "kowongian" id koposion dau, om sawo dau, Emma, minanahak "impohon di apanggor".[32]

Penerbitan

[simbanai | simbanai toud]

Intangai nogi

[simbanai | simbanai toud]

Sukuon

[simbanai | simbanai toud]
  1. ↑ Healy, Nan Savage (2017). Toni Wolff & C. G. Jung: A Collaboration. Los Angeles: Tiberius Press. p. 9. ISBN 978-0-9981128-0-0.
  2. ↑ Bair, Deirdre (2003). Jung. New York: Little, Brown, pg. 293; ISBN 0-316-07665-1
  3. ↑ Healy, Nan Savage (2017). Toni Wolff & C. G. Jung: A Collaboration. Los Angeles: Tiberius Press. pp. 179–183. ISBN 978-0-9981128-0-0.
  4. ↑ Wolff, Toni (1956). Structural Forms of the Feminine Psyche. ASIN: B0007KA7RO
  5. ↑ John Kerr, A Dangerous Method (2012) pp. 338–9.
  6. ↑ Bair, Deirdre (2003). Jung. New York: Little, Brown, p. 198.
  7. ↑ Toni Wolff diary, 20 September 1925, cited in Healy, Nan Savage (2017). Toni Wolff & C. G. Jung: A Collaboration. Los Angeles: Tiberius Press. p. 34. ISBN 978-0-9981128-0-0.
  8. ↑ Champernowne, Irene (1980). A Memoir of Toni Wolff. San Francisco: C.G. Jung Institute of San Francisco. p. 5.
  9. ↑ Bair, Dierdre (2003). Jung. New York: Little, Brown, p. 199.
  10. ↑ Jung to Freud, 29 August 1911; William McGuire, ed., The Freud/Jung Letters (Princeton: Princeton University Press, 1974), 440.
  11. ↑ Carl G. Jung Protocols, Library of Congress, quoted in Lance S. Owens, Jung in Love: The Mysterium in Liber Novus (Gnosis Archive Books, 2015), 39. ISBN 978-0692578278 (Online edition available)
  12. ↑ Keller, Tina (1982). Beginnings of Active Imagination--Analysis with C.G. Jung and Toni Wolff, 1915–1928. Dallas: Spring Publications. p. 257.
  13. ↑ Champernowne, Irene (1980). A Memoir of Toni Wolff. p. 5
  14. ↑ Schär, Hans (1953). Abdankungsansprache Zum Gedenken an Toni Wolff. Memorial service to commemorate the life of Toni Wolff. Zurich: C. G. Jung Archives. p. 18.
  15. ↑ Healy, Nan Savage (2017). Toni Wolff & C. G. Jung: A Collaboration. Los Angeles: Tiberius Press. p. 294. ISBN 978-0-9981128-0-0.
  16. ↑ Jung recounted these event in his 1957 interviews with Aniela Jaffé; Jung's comments are summarized in Lance S. Owens, Jung in Love: The Mysterium in Liber Novus, 39–40.
  17. ↑ John Kerr, A Dangerous Method (2012) p. 503
  18. ↑ Barbara Hannah, Jung: His Life and Work, A Biographical Memoir (1976), pp. 117–22.
  19. ↑ Quoted in John Kerr, A Dangerous Method (2012) p. 209
  20. ↑ N. R. Goldenberg, Reinventing the Body (1993) p. 140
  21. ↑ Claire Douglas, Translate this Darkness (1997) p. 134
  22. ↑ Laurens van der Post, Matter of Heart: The Extraordinary Journey of C. G. Jung into the Soul of Man. Susan Wagner and Mark Whitney. VHS. 1987.
  23. ↑ Bair, Dierdre (2003). Jung. New York: Little, Brown, pg. 293
  24. ↑ Wolff, Toni (1990). "A Few Words on the Psychological Club Zurich and on Professor Jung's Work since 1939". Harvest. 36: 119.
  25. ↑ Aniela Jaffe, Spring 1972 pp. 177–8
  26. ↑ Carl G. Jung Protocols, Library of Congress; quoted in, Lance S. Owens, Jung in Love: The Mysterium in Liber Novus, 46.
  27. ↑ C. G. Jung. Nietzsche's "Zarathustra": Notes on the Seminar Given in 1934–1939 (Lecture V, 19 February 1936). p. 840.
  28. ↑ Bair, Deirdre. (2003). Jung: A Biography. Little, Brown & Company.
  29. ↑ Mark Whitney Carl Jung – Matter of Heart (1985), 1h45m documentary
  30. ↑ Barbara Hannah, Jung: His Life and Work, A Biographical Memoir (1976), pp. 312–3.
  31. ↑ Henderson, J.L. in Champernowne, A Memoir of Toni Wolff (1980), p. 4
  32. ↑ van der Post, Laurens (1975). Jung and the Story of Our Time. New York: Pantheon. pp. 177.

Toud

[simbanai | simbanai toud]
  • Healy, Nan Savage (2017). Toni Wolff & C. G. Jung: A Collaboration. Tiberius Press.
  • Owens, Lance S. (2015). Jung in Love: The Mysterium in Liber Novus. Gnosis Archive Books,  
  • Whitney, Mark (1985). Carl Jung – Matter of Heart, 1h45m documentary in which Toni Wolff is discussed and pictured.
  • Champernowne, Irene (1972). A Memoir of Toni Wolff. C.G. Jung Institute of San Francisco.
  • Davis, D.A. (1997). Jung in the Psychoanalytic movement. In P. Young-Eisendrath & T. Dawson (Eds.). Cambridge Companion to Jung. Cambridge University Press.

Bibliografi

[simbanai | simbanai toud]
  • Healy, Nan Savage (2017). Toni Wolff & C. G. Jung: A Collaboration. Tiberius Press.
  • Owens, Lance S. (2015). Jung in Love: The Mysterium in Liber Novus. Gnosis Archive Books,  
  • Champernowne, Irene (1980). A Memoir of Toni Wolff. San Francisco Jung Institute (montok donlod piri intangai: https://web.archive.org/web/20130623101754/http://www.sfjung.org/about/other_institute_publications.asp).
  • Jensen, Ferne (1983). C.G. Jung, Emma Jung and Toni Wolff: A Collection of Remembrances. Analytical Psychology Club.
  • Kirsch, Thomas B. (2003). Toni Wolff-James Kirsch correspondence. Journal of Analytical Psychology 48 (4), pgs. 499–506.
  • Neri, Nadia (1995). Oltre l'ombra. Donne intorno a Jung. Borla, Roma.
[simbanai | simbanai toud]

Templat:Jung

Naanu mantad "https://dtp.wikipedia.org/w/index.php?title=Toni_Wolff&oldid=21448"