Dusun Labuk

Dusun Labuk nopo nga iso mantad tinaru id Sabah. Diolo' baabaino diti poinsuang id tinimungan tinaru Kadazan-Dusun sabab tu miilang yolo tadat om boros ii doos po miagal. Kogumuan tulun Dusun Labuk poingiyon id kinoyonon sorili Telupid, Beluran, om Sandakan. Tinaru Dusun Labuk papaharo karamaian Kaamatan. Bangkad koubasanan ii gunoon nopo nga Rasuk Labuk. Sayau ii nakangaran tomod montok tinaru dusun labuk diti nointutunan sabaagi "Magalai Labuk" om ompoton do tuni koubasanan ii roitan "titik tungkil" om dialek boros nogi doos kaagal miagal tinaru Kadazan-Dusun ii suai. Dino nopo kopisuai do loyuk pamarait id boros dii.

Kotolinahasan

Dusun Labuk pointonod gulu momonsoi kinoiyonon id disan baang. Diti sabab baang nadadi kowonuan montok mogihum taakanon miampai apasi sabaagi monginginsada. Suai ko' ii, id disan baang milo yolo momorukut kosunion olias sabaagi tongokinotuan mibagal irad pakis, soko, pontiring om suusuai po.

Disan baang nogi nopo nga kinoyonon ii alabung montok mananom parai huma. Fenomena liud koposili koiyonon disan baang apatong tomod om alabung sabab ponimungan nutrien ii noowit do waig mantad sarayo baang. Do dusun labuk poimpasi miundali. Diolo' minundaliu id koiyonon suai montok mogihum kinoyonon ii lobi alabung o tana dau. Sabaagi poomitanan, mogigion Kampung Pinunakan tootopot dau mantad kinoyonon ii lobi doid sarayo om okonko miagal kinoyonon baabaino diti. Diolo' tootopot dau mantad Kampung Bilai om Kampung Kiabau. Kampung Buis om Kampung Berayung nopo nga duo kampuyng ii misombol nogi. Au osuaian nung haro piantakan paganakan diolo' tu moyang diolo mantad paganakan ii agal. Mogiigion Kampung Pinunakan haro piompinaian tobpinai miampai mogiigion Kampung Kiabau, Kampung Buis om Kampung Berayung. Miagal dii nogi miampai Kampung Rumidi om Kampung Sinaputan.

Do sabab do tinaru Dusun Labuk apasi 'berhuma', abaal tomod yolo id suang dumo. Baabaino sukod wagu amu nodii morobuat om linihuan no o kabaalan morobuat miagal ko' rumilik, managad, monutud, mangalana, mangasok, monumpos, moniri, monutuh, mangamata, mongomot, gumamas, mamuau om ogumu po guasan ii no impuun noolingan. Baabaino ginumuan Dusun Labuk nakaanu no koburuon.