Maria Shandi

Maria Shandi (nosusu ontok Milau 1988) nopo nga songulun modsisinding tondig Kristiani. Timpu baino, insaru isido melayani miampai di tapa dau, Pdm. Suwandi, songulun monunupu sinding om speaker.

Minimpuun isido minsingilo mamain piano ontok di 5 nogi toun om vokal soira nokorikot 11 toun. Koimpuunon nopo do pelayanan dau nga ontok di 11 o toun sabaagi modsisinding, maamamain keyboard, momuruan do karayahan om mongingia' sikul minggu. Soira do osomok no korikot 15 toun, mimpuun no isido mooi amung komuniti komulakan om melayani sabaagi susuminding om maamamain do keyboard.

Minapalabus isido album koiso "Sentuh Hatiku" ontok Momuhau 2007^[1]. Id kolimpupuson toun 2008, nakaanu isido gaa mantad Indonesian Gospel Music Award sabaagi modsisinding tondu do tondig Kristiani. Okon nopo ko ii, nakaanu nogi o album "Sentuh Hatiku" do gaa sabaagi album di bobos alaku om sinding poinggingo ontok toun dii. Piipiro sinding mantad album "Sentuh Hatiku" nosiliu sinding pangampot doid sinetron religi om FTV id RCTI. Sinding-sinding nopo dii nga kohompit no Sentuh Hatiku, Dia Mengerti, Mukjizat itu Nyata, Menanti KeajaibanMu, Sejauh Timur dari Barat, Kau Mengenal Hatiku, Kupercaya Janji-Mu.

Ontok wulan Ngiop 2009, minapalanus isido album koduo i kiuhu do "Kupercaya Janji-Mu". Id suang nopo album diti, haro kolaborasi disido id sinding "Tuhan Pasti Sanggup" miampai Mike Mohede, songulun nakalantoi Indonesian Idol. Nosiliu o sinding "Kupercaya Janji-Mu" i sinupu di Liliana Tanoesoedibjo sabaagi sinding tema id ababayan realiti doid RCTI ontok toun 2009.

Id kolimpupuson toun 2009, minapalabus kawagu isido do album natal sabaagi album di kumotolu kiuhu "Christmas in my Heart". Kiwaa 8 sinding natal id Boros Inggeris om Indonesia doid album diti.

Album nopo di kaapat nga pinalabus ontok wulan Mikat 2010 miampai uhu "Masih ada Tuhan". Id suang nopo album diti, kikolaborasi nogi isido miampai piipro modsisinding miagal ko i Mike Mohede, Jason "Sentuh Hatiku", Angel "Idola Cilik", om Edward Chen. Id suang do album diti, suai ko kiwaa o CD kiwaa nogi o VCD sabagi bonus montok di moomomoli. VCD dii kisuang do video klip Maria Shandi. Konsep nopo do album diti nga mangangat toinsanan mokiikinongou montok tumilombus otumbayaan om lumansan kumaa Kinorohingan sundung do miagal aiso no o ralan nga kotumbayaai no do osontob Isio mononduli koposion tokou.

Minapalabus isido album "Kasih Tuhan sabaagi album kolimo id pintangaan toun 2012. Kiwaa soginumu 12 sinding i poposusui kokomoi tupus om kosonongon do Kinorohingan.

Ontok 23 Momuhau 2013, nokoumbal isido nokotindapou id ababayan televisyen Dahsyat RCTI.

Ontok 8 Magus 2020, suminawo isido miampai di Adythia Pratama, songulun mongindapu, monunuat buuk, speaker seminar bisnes om aktivis sosial.

Ontok 26 Ngiop 2021, minogosusu isido songulun tanak kusai i pinungaranan do i Akasa Pratama Kurniawan.