Mi guring

Mee guring toi ko’mi ginuring morujuk do mi i ginuring tumanud koubasanan tinimungan bansa id pogun Asia Tanggara i momoguno do boros Malayu sabaagi piromutan, miagal ko’ Brunei, Malaysia om Singapura.

Mi guring i ointutunan kogumuan tulun nopo nga lohoon sabaagi mi guring mamak i pobolion do tulun India muslim id kakadayan do mamak. Oubasan nopo, roso mi guring mamak diti opodos.

Tadon

Haro ogumu kawo mi guring i milo orubaan id Brunei, Malaysia om Singapura. Iso nopo do kawo mi guring dii, pinoburu do tulun imigran india (Tamil muslim). Pinorolot om pinoaplikasi diolo o roromu koubasanan waya pogogonsok komuniti id waya pogogonsok diolo. Komoyon nopo nga waya onsokon I mi guring nopo nga unik tu’ mogisusuuai laang. Nakadi o proses diti sabab tu’ id pogun tadon do tulun diti, takaanon mi guring aiso id koubasanan diolo.

Waya Mogonsok

Aiso o spesifikasi standard waya pogogonsok montok kawo-kawo mi guring tu’ waya mogonsok mi guring nopo nga mogigiio nopo ngawi. I popisuai standard roso do mi guring nopo nga, tumanud kawo mi di gunoon id proses mogonsok mi guring. Waya koubasanan do mogonsok mi guring kohompit do guringon i mi miampai do kinotuan, tontolu’, tauhu toi ko’ daging. Id waya pogogonsok india do mi guring pohompiton diolo o rampa’ miagal ko sos tomato, ubi gantang, kubis om kisap. Suai ko iri, soira noonsok i mi guring, potonggoyon diolo patod do limau (kawo calamansi) id piring miampai mi guring dii.

Malaysia

Id Malaysia, oubasan nopo mi guring mamak ogumu pobolion id kogumuan kinoyonon id pogun diti. Hogot mamak naanu mantad istila mamak i kirati do gaman. Istila diti gunoon id Malaysia om Singapura sabaagi iso istila boros pomolohou kumaa tauke kadai dii. Oubasan mi guring mamak mionit do tulun india muslim om takaanon diti pobolion id kadai makan do mamak. Kawo mi guring diti nopo nga kopiomungan do mi tosilou Sina (Chinese yellow noodles) mimpai paranca’ om rampa’ do Malayu om India.

Maggi goreng toi ko Maggi mee goreng nopo nga iso kawo mi guring id waya pogogonsok do mamak. Kapamansayan do kawo mi guring diti, momoguno do mi segera janama’ Maggi, i pogolokon no miampai waig talasu pogulu do guringon.

Singapura

Id pogun Singapura, takaanon diti kadaau haro pionitan miampai waya pogogonsok tulun india muslim. Id komuniti pogun diti oubasan momoguno do kambing toi ko’ mutton id resipi mi guring diolo. Kawo mi guring i ointutunan id Singapura pinointutun mantad etnik Sina id Punggol ontok 1970-an. Waya pogogonsok mi guring etnik diti kohompit poporolot seafood, tauge, roun kotumbar om sambal di noonsoi mantad 12 kawo rusap om rampa’.

Sri Lanka

Takaanon do mi guring nokointutun id pogun Sri Lanka gama do sajara, i nopo nga maya pangaru woyo om koubasanan do Malayu.