Semantik

Semantik nopo nga ponoriukan rati istila. Tadon do hoot diti nopo nga mantad hogot Boros Yunani Purba σημαντικός "semantikos" di mogowit pokomoyon "rati di oponsol".

Koubasanan nopo nga kiwaa pisuayan do "semantik" om "sintaksis". Id ahal dilo, "semantik" monuku kumaa rati hogot daamot diri "sintaksis" monuku kumaa struktur toi ko' pola formal montok kotolinahasan (poomitanan, maya ponuatan toi ko pibarasan).

Pokomoyon om gana kohompit

Semantik nopo nga ponoriukan kokomoi do rati id boros. Ahal diti nopo nga iso ponoriukan sistematik ii monoriuk do nunu rati liguistik di om poingkuro do nobontuk. Monginonong o semantik kokomoi poingkuro isoiso kaapo obontuk mantad mogikaakawo lapau do roromu miagal ko morfem, hogot, klausa, panandatan om teks miampai poingkuro rati do monikid roromu di mamarahung do tiso om tiso. Semantik nopo nga milo manahak tarad kumaa isoiso boros pointantu, miagal ko boros Inggeris, nga id rati hogot di lobi osiwang, monoriuk do struktur rati ii kohompit do toinsanai boros. Sabaagi iso disiplin deskriptif, tudu dau nopo nga montok mamarati poingkuro rati kipungsi miampai aiso kooturan rati di pointantu ii maan da piromuto do sosongulun miampai isoiso kaapo. Piipiro poguhatan poinlobi id semantik nopo nga kohompit do "Poingkuro rati hogot piomungon montok momonsoi rati panandatan?", Poingkuro rati kopionit do pomusarahan moboros do boros om miampai kakamot-kakamot ii sukuon do hogot?" om "Nunu piromutan do rati isoiso hogot miampai konteks pomogunaan daui?". Gana poinlobi id semantik kohimpit do linguistik, semiotik om falsafah. Suai ko sabaagi iso gana ponoriukan, semantik nogi nga milo sumuku kumaa teori-teori id gana diti, miagal semantik kipogontok-katapatan (truth-conditional semantics), om nogi kumaa rati boborosn pointantu, poomitanan montok hogot fairy.

Sabaagi iso gana ponoriukan, haro duo aspek id semantik: suang om soliwan. Aspek suang nopo nga manahak torodok kumaa pionitan do hogot om fenomena mental ii poimbulai'on, miagal ko idea om kopokitanan konseptual. Aspek soliwan nopo nga monoriuk kokomoi poingkuro hogot sumuku kumaa objek id pomogunan kopio om id kongoi-ongoyon do isoiso panandatan di nopo nga asalu ko amu.

Ogumu disiplin ii kohompit ii monoriuk kadau do boros om rati. Semantik nopo nga mogisuusuai tumanud subgana linguistik suai ii tumorodok kumaa aspek boros ii mogisuusuai.fonologi nopo nga monoriuk mogikaakawo kawo do tuni ii gunoon id boros om poingkuro tuni di piomungon montok momonsoi panandatan, sumusuhut sintaksis nopo nga monoriuk kooturan ii papatantu do poingkuro hogot maan uludo monotk papaasil do panandatan. Kopomogiaan diti nopo nga otolinahas tu kaanu sosongulun di monginobos do isoiso aspek boros nga amu montok di suai, miagal ko sosongulun di koilo mamarait do iso panandatan nga amu koilo do rati dau. Sabaagi do iso rapang id semiotik, semantik nopo nga haro torodok di lobi poimbida kumaa rati id boros, semiotik nopo nga monoriuk goduo-duo tanda linguistik om okon ko linguistik. Semiotik nogi nga monoriuk do topik pomoruhangan miagal ko rati piromutan okon lisan, simbol konvensional, om rati sandad ii nokoimbulai miampai aiso pinonugkuan do tulun. Poomitanan nopo nga kosuang do mintuku sabaagi panakatanda do pinisokodungan, buris id rasuk saragam ii pokito do gaa, om kotindapaan do tombolog hering ii manakatanda do haro lohot do tayam id somok.

Noputan Labus

• http://www.tutor.com.my/tutor/stpm/semantik/semantik.htm