Simpung tinaru
Simpung tinaru nopo nga timungan tulun i koinano dau popohompit sondii maya isoiso tinungkus tompinai dau, awasi' tinungkus olinuud sundung i monindu. Kointutunan tinaru minog poposuni miampai mogisuusuai tinimungan sondii mantad tinimungan suai maya kowoowoyon irad koubasanan, boros, kotumbayaan, om koimaan. Karalano diti monutu abayaan miagal di nointutunan sabaagi puuntinaru (ethnogenesis).
Kotinoruan nopo nga iso ralan oponsol kumaa tulun dii rumomut sondii. Tumanud simpunggayo "Tantaban Magadang do Winorun Kotinoruan: Simbakuro, Komisiwal om Katapatan" pinaharo miniampot do Puhuyap Kanada (Statistics Canada) om Koonggomon Puhuyap Amirika (United States Census Bureau) (1-3 Ngiop 1992), "Kotinoruan nopo pounayan tuou id koposion tulun: iti nopo nga sauk (phenomenon) i nokorolot id suang kabaalon tulun".
Poingkukuro pia, ogumu puru simbakuro kopupuruan (social science) irad puru sidtulun (anthropology) Fredrik Barth om Eric Wolf au monindu kointutunan tinaru sabaagi pomogunan. Kasahap, monugat diolo' do kotinoruan nopo nga iso totus mantad kawo pikamaan pialatan isoiso timungan, okon ko iso bahazan (kowowoyoon) nokorolot i tuou id suang timungan tulun. Katangkapan, koinano tua' timungan tinaru manayad pilombusan koubasanan moyo hiza (maso). Mulong dilo, puru susuyan om puru sidkoubasanantulun (cultural anthropology) nokokito asaru, ogumu mantad tahang, koubasanan, om inubas (norms) i binoros mamangki' do pilombusan mikuo di tontok laid nopo, pointopot sinupuan wagu.