Azah Aziz

Azah Aziz
Fail:Sharifah Azah Mohammad Alsagoff.jpg
Personal details
Born	Sharifah Azah binti Syed Mohammad Alsagoff (1928-08-21)Magus 21, 1928 Negeri-negeri Selat (kini Singapura)
Died	Madas 9, 2012(2012-07-09) (umul 83) Kuala Lumpur, Malaysia
Resting place	Tanah Perkuburan Islam Bukit Kiara
Spouse	Ungku Abdul Aziz bin Ungku Abdul Hamid
Children	Zeti Akhtar Aziz
Occupation	Monunuat, kolumnis, lundu budayawan

Sharifah Azah Mohammad Alsagoff @ Norazah Abdul Aziz toi ko' Azah Aziz nga lobi otutunan sabaagi Mak Ungku (21 Magus 1928 - 9 Madas 2012) nopo nga songulun lundu koubasanan Melayu id Malaysia. Isido nopo nga sawo di Profesor Diraja Ungku Aziz om tina di bagas Gabenor Bank Negara Malaysia, Tan Sri Dr. Zeti Akhtar Aziz.

Biografi

Isido diti nopo nga' haro raha piomungan mantad Melayu, Turki om  Arab. Poinsikul isido id Sekolah Convent, Johor Bharu om tuminanud pondidikan Jepun maamaso Pisangadan Pomogunan II. Ontok di umul 18 toun, nakasawo isido di Ungku Abdul Aziz bin Ungku Abdul Hamid om nakaanu songulun tanak, YM Tan Sri Dato' Ungku Dr. Zeti Akhtar Aziz, i nokoumbal nopili sabaagi songulun Gabenor Bank Negara Malaysia. Minidu isido pogun ontok 9 Madas 2012.

Pakalajaan

Kumalaja isido id Jabatan Kebajikan Masyarakat Johor Bharu antakan di 1949-1951. Kalapas dii, sabaagi setiausaha id jabatan sosial, Universiti Malaya, Singapura. Potilombus, sabaagi setiausaha kumaa Pendeta Za'ba id Jabatan Pengajian Melayu id UM.

Wartawan om Monunuat

Azah Aziz nopo nga' songulun di minongimpuun om nogi Presiden kumaa Koisaan Wartawan Tongoondu Malaysia (Kumoiso) (1971-1978) om University Women's Asociation. Koumbal nogi isido nokosiliu do momisunud Kumoiso. Azah Aziz nopo nga' songulun woyoon kumaa wartawan tongoondu di tongomulok.

Isido nopo nga' tondu di osopung kopio mongobi nasip om hak koonduan lobi-lobi no isu piagalan pongolus montok tondu om kusai, cukai misuai montok sawo tondu di kumaraja. Isido nogi nga' mobi id suang do Pindaan Undang-Undang Perkahwinan tulun okon ko' Islam om paganakan Islam.

Mantad toun 1957-1973, solinaid 16 toun sumiliu do monunuat abar Berita Harian - lobi-lobi no id bolikan koonduan. 1973 - 1978, editor montok Utusan Malaysia / Utusan Melayu om konsultan montok majalah koonduan.

Sabaagi monunuat, isido nogi nga' kirahi montok monimung songket laid om kirahi do koubasanan inus tinungkusan om nogi inus sastara pogun. Minomungaran nogi isido do 'Pancaindera', ii otutunan sabaagi do akhbar pinosisip id Mingguan Malaysia maamaso poingkalaja i Tan Sri Zainuddin Maidin sabaagi pengarang id Utusan Melayu. Luguan Pegawai Eksekutif Institut Akhbar Malaysia (MPI) Datuk Chamil Wariya minamarait di Azah Aziz sabaagi songulun mongingia' id gana ponuatan rencana tu' insaru monuduk om manapanai do wartawan kadet montok papaasil ponuatan rencana. Komited om poingukab o pomusarahan di Azah Aziz solinaid nokosiliu do ponyunting id mija Rencana maamaso poingkalaja id Utusan Melayu antakan di toun 1973. Manahak isido do ogumu kosiwatan kumaa wartawan montok papaasil ponuatan rencana ii katalib do borita (maya momulinahas iso-iso borita) moi do kaanu papaasil rencana di kikualiti om manahak bagas kumaa mambasa.

Isido nogi o tulun kumoiso pinopointutun do Haiku toi ko' hiis toniba id boros Jepun kumaa tulun ginumuan id Malaysia.

Isido nogi nga' tondu kumoiso id Malaysia ii pinoposoliwan do buuk pantun om sinding tangaanak maya syarikat disio sondii, 'Akaz'.

Nokotindapou i Azah Aziz id Persidangan Penulis Wanita Asia-Pasifik id East West Centre, Honolulu, Hawaii(1972), Simposium Wanita Afro-Asia id Iskandariah,Mesir, maamaso Tahun Wanita Antarabangsa (1975) om aktiviti kipionitan do kewartawanan, tinunturu, tekstil om kesusasteraan tangaanak.

Baino, isido nogi nga' puru lembaga momisunud montok longkod pambasaan pogun om puru lembaga momisunud montok The Encyclopedia of Malaysia.

Budayawan

Noroitan nogi isido sabaagi Budayawan Malayu tu' aanangan om kirahi disido do monimung tekstil koubasanan, porhiasan, rasuk koubasanan om tinunturu koubasanan Melayu. Mantad di toun 1950-an, monuat om manahak isido carama kokomoi do koubasanan om koinusan Melayu. Isido nogi nga' pinopointutun do rasuk drama sayau id suang do Festival Kesenian Universiti-universiti ASEAN.

Abaal nogi isido berpantun om pantun di pinaasil nopo nga' apagon do ala'on tulun suai, sabaagi poomitanan pantun di sinuat disio nokosiliu do pomolumis kulit majalan Mastika mantad di laid po.

Pinotoluod

Nokosiliu isido do puru lembaga mongingigit amanah Yayasan tun Razak (1977 - ), Puru lembaga FINAS (1981 - 1984), puru majlis monunuduk koubasanan kabansaan (nokobubar no) (1978-1983) (1987-1990), puru lembaga monunuduk KARYANEKA (1987 - gisom nokobubar). Puru lembaga popoingkakat Kraftangan Malaysia om puru Tribunal Hak Cipta (1987-1989).

Isido nogi nga' minongimpuun do Pertubuhan Tindakan Wanita Islam (Pertiwi) ii aktif montok mongobi nasip koonduan om tangaanak id Malaysia.

Kinapatayon

Antakan di 9 Madas 2012, minidu pogun i Azah Aziz maamaso kiumul 83 toun tu' sumakit otuo. Noontok isido do angin ahmar om insaru misoguli id hospital swasta montok maganu pongusapan. Sambayang rata pinaharo id Masjid Saidina Abu Bakar As-Siddiq, Bangsar. Om majlis pamalabangan pinaharo id Tanah Perkuburan Islam Bukit Kiara. Nokorikot nogi diri nga' i Tun Dr. Mahathir Mohamad om sawo, Tun Dr. Siti Hasmah Mohd Ali om nogi toinsanan paganakan om koombolutan.

Asil karya

Id siriba nopo nga' piipiro karya ponuatan disido :

1. Adik sayang - antologi pantun tangaanak (1971),
2. Puisi Kanak-Kanak - antologi hiis nokoburu montok tangaanak (1967)
3. Pantun Kanak-Kanak - antologi onom jilid pantun melayu tradisional montok tangaanak
4. Dendang dan Dondang kanak-kanak - lagu-lagu tradisional montok tangaanak ii sinuat miampai di Dr. Ariff Ahmad (1990).
5. Taman Seni - buku kokomoi tinunturu Melayu sabaagi kopointutunan kumaa tangaanak (1987)
6. Marilah Bermain - kokomoi pomoinan tradisional (1993)
7. Selayang Kenangan - tinimungan esei om ponuatan suai kokomoi koonduan, rasuk koubasanan om tinunturu (1990).

Rujukan

1. Biografi Tokoh Wanita Malaysia. PERTIWI. Kuala Lumpur: Pelanduk Publications.