Chris Vadham

Chris Vadham toi ko' ngaran kopiipio Kristhinathan Aseyatham nopo nga songulun susuminding mantad Singapura nga nointutunan id Malaysia. Pogulu dii, minampayat isio Tinimungan Gingerbread om Western Union Band id Singapura pogulu minamarakam album solo.

Chris Vadham nopo nga susuminding okon Malayu mantad Singapura nga suminding do sinding Malayu. Minapaasil isio tolu album om nointutunan maya sinding mantad album koiso dau, ii no Hanya Nyanyian Dalam Sepi. Sinding ointutunan dau di suai nopo nga Kita Adalah Pelakon Dunia.

Karaja muzik

Chris Vadham nopo nga puru tinimungan Western Union Band i ointutunan ontok era 70an. Western Union Band nopo nga iso mantad kugiran Singapura i popokito mogisuusuai momogun om bansa. Puru nopo dau nga mantad tinaru India, Cina om Malayu, Yolo nopo dii nga i Chris Vadham, Rennie Ho, Abel Gan, Tony Cong Sidek Marican, Danny Lim, Peter Mangkok, Daniel Wee Dan Benji. Tinimungan i noturidong ontok toun 1971 diti minamarakam piipiro sinding ointutunan miagal do My Lady om Sausolito. Orohian o tinimungan diti poposolimbou sinding-sinding Bee Gees gisom nakaanu pamalahawan sabaagi The Bee Gees Of Singapore.

Ontok toun 1973, soira pinogirot do huguan o kooturan disko om kelab malam, minidu o piipiro puru tinimungan diti. Ontok toun 1976, pinoluau kawagu do huguan o kooturan disko om kelab malam, dadi nokoguli kawagu aparagat o Western Union Band. Ontok toun 1977, minongoi i Chris miampai tinimungan dau hilo Hong Kong montok popointutun album koiso diolo id suang boros Inggeris kiuhu WUB. I nopo timpuunon, tumimporon daa yolo hilo solinaid 6 tulan nga noputan kawagu kontrak dau om alaid di pointimporon hilo. Soira nolimpupusan kontrak dii, ginumuli koombolutan dau hilo Singapura, nga pointimporon kasari isio hilo Hong Kong montok mogihum karaja. Montok dau, muzik om gan inus kohiakan nopo nga nosiliu no koposion dau tu kiangkab isio mimpanau gisom hilo Eropah tu manu papaasil sinding Inggeris do hilo.

Mimpuun do pinointutun i Chris Vadham kumaa di asanangan do sinding Malayu maya album koiso dau Hanya Nyanyian Dalam Sepi i pinalabus do syarikat rakaman Polygram. Haro nogi apat sinding sinupu dau sondii id suang album diti. Koingkawas o sinding di tumanud taang id suang katayadan Lagu Pujaan Minggu Ini (LPMI) pinalabus Adnan Maswan maya Radio Dua Perbadanan Penyiaran Singapura. Gama kalantayon dii, nakapaasil nogi album koduo ii no Gerimis Hati. Nung pibagalon album koiso, okito do lobi kikotumbayaan kumaa tinan sondii isio monupu sinding wagu.

Album i kisuang 9 sinding diti popotunui apat sinding di sinupu dau miagal do Mimpi Semalam, Pertemuan Pertama, Nyanyian Sepucuk Surat, om Tatamu. Suai ko' album Hanya Nyanyian Dalam Sepi (1983) om Gerimis Hati (1984), minapalabus nogi isio apat album solo miagal doLagumu Laguku (1985), Kita Adalah Pelakon Dunia (1985), Mimpiku Retak Seribu (1987), om One For Everyone (1994).

Kinapatayon

Minidu pogun i Chris Vadham id Watford, England ontok 26 Mansak 2007 gama kanser ginawo.

Diskografi

Album

1. Lagu-Lagu Koleksi Sentimental - Chris Vadham
2. Hanya Nyanyian Dalam Sepi - Chris Vadham
3. Gerimis Hati - Chris Vadham
4. Kita Adalah Pelakon Dunia
5. Lagumu Laguku
6. Mimpiku Retak Seribu
7. One For Everyone

Noputan labus

• Chris Vadham