Rungus
Dusun / Momogun / Momogun Rungus | |
|---|---|
 | |
| Total population | |
| 74 000 | |
| Regions with significant populations | |
 Malaysia(Sabah) | |
| Boros | |
| Rungus, Malay | |
| Ugama | |
| Christianity (95%), Islam and Animism (5%) | |
| Related ethnic groups | |
| Kadazan-Dusun, Murut, and Lun Bawang/Lundayeh |
Rungus nopo nga' iso tinaru id Sabah om nogi mogigion mantad do kopulauan Borneo. Rungus koubasan nopo nga' otutunan sabaagi Dayak Dusun Rungus, Momogun, Momogun Rungus, Momogun Rahat, Dusun Rahat toi ko' Rungus. ''Rungus'' nopo nga' naanu mantad hogot Rungsud toi ko' komolohingan do tinaru Rungus di minundaliu mantad kinoyonon Nunuk Ragang kinumaa id disan kotogisan id Samananjung Kudat, Teluk Marudu, Pitas, Beluran om Telupid.[1]. Kiwaa kiikiro 74 000 tulun Rungus i haro id Sabah no.
Aki Rungsud nopo nga' songulun lundu Momogun Rahat ii minongukab kinoyonon Kudat-Bandau di pogulu po. Istilah kopomogunoon ngaran [Momogun][2] nopo nga' sumuku kumaa ngaran tinaru Rungus sondii. Tumanud legenda Momogun Rungus, Aki Rungsud nopo nga' lundu ii minongukab kinoyonon id Bandau-Kudat sabaagi kawasan pordagangan barter di bobos tagayo id rantau Samananjung Berungus om Teluk Bandau Borneo ontok timpu di laid po. Teluk Bandau nopo nga' iso longkod pamadagangan Momogun Rungus Kuno. Kakamot di padagangon id teluk Bandau nopo nga' miagal do mundok, punti, luong, tawadak, asil-asil talun, kain tenunan Rungus om suai-suai po. Toud lison nogi nga' nakarait do istilah RUNGUS montok etnik Rungus id Kudat naanu mantad Boros Bajau om Boros Suluk ii roitan do ''UNGUS'' ii kirati do TOGIS.
Tadau diti, miampai politik, koinsanai suku Momogun id Sabah pinotimung id kategori Tinaaru Kadazandusun-Murut (KDM). Rungus nopo nga' iso sub tinimungan ii poinsuang id tinimungan Tinaru Kadazan-Dusun. Rungus nopo nga' kiharo boros di oruhai kopiagal do boros Dusun id Sabah. Mantad pogintangan inus arkitektur om boros tinaru Momogun RUngus, otolinahas do kopokitanan masyarakat Momogun Rungus haro kopiagalan miampai sistom koubasanan Dayak. Dayak nopo nga' istilah khusus montok mogigion asli id Kopulauan Borneo.
Masyarakat Momogun Rungus papadagang mimpai tulun labus miagal do Sulu om Brunei montok maganu kakamot logam, kakamot tembaga cina, tembikar cina, kain cina om suai-suai po. Momogun Rungus kiharo adat papadagang sondii hinonggo papadagang mantad labus au pasagaon do mongukad tana kolobi do ''Duvo Lzangod'' toi ko' duo kaki. Papadagang mantad labus nogi nga' au milo managad talun toi ko' mongukab kinoyonon montok pomogompian tayam toi ko mongukab porobuatan. Popowonsoi nopo miagal diti nga' kalanggar no kooturan ugama [Labus][Labus][3] (roiton sabaagi Lzabvus) tinaru Momogun Rungus. Sistom kesukuan Momogun Rungus diti nopo nga' iso sistom di bordaulat ontok timpu dii. Iti nopo nga' kisabap do maya koubasanan Samananjung Kudat om Teluk Bandau alaid no umoligon do suku tinaru Momogun Rungus.